الأربعاء، 17 يونيو 2009

(طويل العمر يطول عمرة ويزهزه عصرة وينصرة على من يعادية.. هاى هىء)!!؟‏


السلام والرحمة على اعضاء المدونة الكرام

ليلة امبارح مجانيش نوم... لا مش اغنية سيد درويش, فعلا امبارح بعد مرجعت من الصالة,طبعا هتسالونى : انت سايب البيت كلة يا عم امير وقاعد ف الصالة؟؟
لا يا جدعااان الصالة دى قهوة شبابية بنقعد عليها انا واصحابى , بس انا بتحرج اقول قهوة يعنى, مكانتى العملية والعلمية تمنعنى من ذلك. احم احم

المهم: رجعت وغيرت هدومى وجيت انام , مش جايلى نوم, وفين وفييين على ما جانى نوم.

ولما نمت حلمت خير اللهم اجعلة خير
انى قاعد مع اصحابى ع الصالة(القهوة) وقولتلهم انا اخترعت الة السفر عبر الزمن!!!؟

طبعا اللى شتم ...واللى ضرب ...واللى بص بقرف...!
قولتلهم لو مش مصدقين تعالوا معايا البيت!!!؟ وانا اسافر بيكم بالزمن
وبالفعل, اخدت اصحابى ورحت البيت وطلعنا اوضتى
وفرجتهم ع الالة, كانوا منبهرين جدا
وجة الواد هيثم الرخم وقالى عايزين نطلع 50 سنة لقدام
قولتلة بلاش يا هيثم؟ 
قالى لا والله لنسافر 50 سنة قدام عشان نشوف احوال البلد
انا بينى وبينكم مكنتش عايز, عشان كنت حاسس ان حاجة هتحصل.
قلتلهم ماشى, اصل بصراحة مقدرش استغنى عن عمرى واخالف اوامر هيثم؟
اصل هيثم دة من فصيلة الفراعنة, حاجة كدة محصلتش قبل كدة , طول وعرض وهيبة, دة كفاية كف ايدة بس, كان مشروع جزمة وفشل.

قلتلهم يلا, الكل يربط الاحزمة ونتكل على الله.

وظبط الزمن بتاع الالة على سنة 2059 , والمكان: مصر, والمدة 24 ساعة
وبالفعل, رحنا سنة 2059 , وجيت ابص لقيت نفسى قدام تمثال سعد باشا
قلت الحمد لله, انهم لسة باقيين على سعد باشا ومطلعهوش حرامى ولا حاجة

ولقيت محمود , محمود دة صاحبى برضة يا جماعة بس مثقف شوية زى حالاتى كدة
بيقولى متشوف لينا راديو يا عم امير؟؟
قولتلة لية يا حودة خير؟؟
قالى اصلك لما تحب تعرف ثقافات الشعوب تفتح الراديو وتقلب ف المحطات
قلتلة والله عندك حق يا حودة

وطلعت الموبايل بتاعى ابو كمرتين دة , وجبت الراديو
وجبت اذاعة باريس
ولقيت واحدة بترطن بالفرنساوى, فيما معناة
ان فرنسا اسست مستعمرة قمرية,(فوق القمر يعنى), ولكن عندها مشاكل ف الصرف الصحى ....

قلت والله كويس فرنسا بنت ع القمر عقبالك يا امى(مصر يعنى).!!!.


نقلت على اذاعة السودان
لقيت المذيع بيقول:مظاهرات حاشدة ف العاصمة السودانية بسبب سقوط الرحلة رقم 45654 للمريخ, ومقتل كل من ف الرحلة, والمظاهرات تنشد بعزل الحاكم, والوزارة.

قلت والله عاااااااال , المريخ مرة واحدة دة اكيد مصر بقا طلعت المشترى!!!.


نقلت على اذاعة الشرق الاوسط المصرية من المقهورة(القاهرة سابقا).

ويا ريتتنى مقلبت

*لقيت الاغنية هى هياها شغالة.!!!(وعشان كدة احنا اخترناك)*

(وعشان كدة احنا اخترناك)


(وعشان كدة احنا اخترناك)



قلت: كفااااااااااية, حرااااااااااااام.
ياااااااااة, بعد خمسين سنة, دة الناس طلعت القمر وعدت ع المريخ
وانت لسة موجود, لا واية بنغنيلة اغنيتة المفضلة.

ولقينا عربية امن مركزى معدية علينا واحنا واقفين.
فقلنا ف نفس واحد
(طويل العمر يطول عمرة ويزهزه عصرة وينصرة على من يعادية.. هاى هىء)
بص لنا اللواء من الشباك, وعملنا بصابعة كدة, يعنى تمام , استمروا.

وصحيت من النوم وانا بقول(هاى هىء...هاى هىء)!!!!!!.

دة مكنش حلم يا اخونا, دة كان كابووووووووس طخين

انا عارف ان احلامى رخمة, بس ادعولى تتظبط عن كدة
مع تحيات/ امير وبس

هناك 4 تعليقات:

  1. ههههههههههههههههههههه
    ايه يا عم الجراءه دى
    ده انت بايعها ولا ايه؟
    خاف على نفسك بقى
    هههههههههههههههههههههههه

    ردحذف
  2. يلا نعلق هنا احسن من الفيس....هما كلمتين..ربنا يستر..ربنا يستر..ربنا يستر
    ..وماشاء الله اولاد دمياط عاملين شغل جامد اوي..ربنا يسهل..((لاني بشتغل في حديد عز)) هههههههههههه

    ردحذف
  3. انا مش عارف انت او انتى مين؟؟
    بس يمكن تكونى صفا
    من طريقة كلامك
    عموما نورتى وشرفتى المدونة

    وربنا يستر

    ردحذف