الاثنين، 14 ديسمبر 2009

أرنب ينجب "فيلاً صغيراً" بالجيزة (سبحان الله)


http://www.youm7.com/News.asp?NewsID=166327&


شهدت منطقة ساقية مكى بالجيزة واقعة غريبة تمثلت فى إنجاب أنثى أرنب، مولوداً صغيراً ملامحه تتطابق مع هيئة الفيل "زلومة وأذن كبيرة وذيل الفيل الصغير، وبنفس درجة اللون".


"أحمد عواد عبد الفتاح" (27 سنة) جزار، ويهوى تربية الأرانب منذ صغره، وقال إن إحدى الأرانب الأنثى كانت حاملا، وفور ولادتها اكتشف أن بينهم حيواناً صغيراً "رمادى اللون"، وبتفقده اكتشف أن ملامحه تدل على أنه فيل.


وأضاف أحمد بأنه أكتشف أن الحيوان به "زلومة صغيرة ولديه أذن الفيل العريضة وذيله الصغير"، ولكنه توفى عقب ولادته بـ3 ساعات، وهو ما دفعه للتحفظ عليه داخل قطعة قماش ووضعه داخل الثلاجة حتى لا يتحلل.

ورفض عبد الفتاح التقاط صوراً للأرنب الأم الذى أنجبته خوفاً عليها من الحسد.


اللينك اللى علية الصور اعلى الصفحة




الخميس، 27 أغسطس 2009

قدام بوابة الكلية



قدام بوابة الكلية

والناس قدامى رايحة وجاية..
وقفة الوقفة اللى هية..
مستنيها ومعايا الوردة البنفسجية..
ودبدوب ف شنطة عيونة وردية..
كانوا هديتى ليها ف عيد الحب والرمانسية..
ولمحتها من بعيد جاية..
ومعاها شنطة:فقلت: دى اكيد مفاجاة ليا..
اصل عمرها منسيت تجيبلى ف عيد الحب هدية..
جت وقلتلها ازيك يا ام عيون عسلية..
يا اجمل انسانة ف تاريخ البشرية..
ساكتة لية مش هتردى السلام عليا؟؟
قالتلى: بص بقى: دى هداياك على داير هدية!!
ومن النهاردة لا انا ليك ولا انت ليا!!؟
انت من سكة وانا من سكة تانية..
قلتلها:اكيد انتى واحدة تانية..
مش انتى اللى كنتى بتشاركينى احلامى الوردية..
ولا دة القلب اللى كان بيحس بيا..
قالتلى : مهو انا خلاص بعت القضية..
وهرتبط بواحد معاة فيلا وعربية..
ويلا بالسلامة يا عنية..
وقفت وكانى غرقان ف شبر مية..
بقا انا يتقالى بالسلامة يا عنية..
ولقيتها وقفت قدام حتة عربية..
ونزل من العربية واد خنفس من بتاع الايام دية..
سلم عليها وركبوا العربية..
قلت يااااة ع الدنيا الفانية..
راحت ايام الرومانسية..
وبقينا ف زمن المليون والالف والمية..
بس انا اللى غلطان..
كان لازم يبقى عندى فيلا وعربية..


وهو دة اللى حصل قدام بوابة الكلية


(احلى اصلع واجمل جاموسة)!!!!؟


السلام والرحمة على اعضاء الجروب والمدونة الكرام

الواحد بصراحة مش عارف يكتب عن اية ولا اية ولا اية؟؟

اكتب على البطالة والشباب والقهاوى,ولا عن فوازير رمضان اللى تخنق, ولا عن الاعلانات بتاعت اليومين دول, ولا عن الاخ(ودييييع) بتاع ميلودى اللى بتتحدى الملل
ولا عن انفلونزا الخنازير, ولا عن انفلونزا الكلاب(ايوا متستغربش نزلت ف كوريا والهند والصين انفلونزا الكلاب),ولا اكتب عن الحكومة الموقرة, ولا بلاش الحكومة اصل الكلام عنها بيفطر واحنا ف شهر كريم كل سنة وانتم طيبين.
ولا عن اية بالظبط؟؟

والله الواحد محتار لدرجة انى حلفت منا كاتب حاجة خالص
بس لفت نظرى حاجة مستفزة اوى, لدرجة انى قلت انى لازم اكتب عنها وتشاركونى ف الموضوع

مسابقة( احلى اصلع عربى)!!!!!؟

اة وربنا زى ما انت قرات كدة, الناس سابت مشكلة فلسطين والعراق ولقمة العيش , وبيدوروا على احلى اصلع عربى

يا لهوووووووى يا خراااااااااابى

غطينى يا امى وهاتى اصحابك وصوتوا عليا
للدرجة دى ,وبعدين هو فى اصلع حلو وانا مش واخد بالى,ولا هو قصر ديل يا زعر يعنى
مش بعيد يطلع واحد بعد ما يفوز بالمسابقة ويقولك(انا بصراحة ما اتخيلش نفسى الا وانا اصلع) امااال لو كان طلع لجنابك شوية شعر كنت عاملت اية عيد ميلاد!!!؟

وانا مش فاهم يعنى اية ميزة انى اكون اصلع!!!؟ اصل مكتوب فى الاعلان

(نستكشف ميزة ان تكون أصلعاً.) تقولش كولمبس يا خويا

طب اية الميزة ف كدة!!؟ هل هوفر ف الكهرباء, ولا مش هحرق جاز كتييير
ولا اية بالظبط؟؟
ولا يمكن هبقى صديق للبيئة يعنى
ولا يمكن قصدهم لما المطر ينزل هيتزحلق على طول؟؟
وربنا حاجة غريبة؟؟
الناس خلاص مش لقية شغلانة تقوم تشتغلنا احنا, اة وربنا؟؟

لا وبيقولك اية كمان( التصويت للسيدات فقط)
صوتى يا اللى منتيش غرمانة؟؟
ست مين اتهرشت ف نفوخها وهتصوت لواحد اصلع!!!؟

والله عالم هبلة بجد يعنى, انا ع العموم مش مستغرب معنتش بستغرب لحاجة اساسا,

اللى خلانى اقرا من كام سنة الاعلان بتاع (اجمل جاموسة ف مصر)!!!!!!؟

(مع كامل احترامى لحضرات السادة اللى بيقراوا المقال)
و كانوا جايبين الجاموسة اللى طلعت يا محلى نورها ومصورينها وحاطين صورتها ف جرنال الجمهورية احد جرائدنا القومية وحاطين حوالين رقبتها وسام وميدالية اجمل جاموسة ف مصر
واعطوا لصاحبها مبلغ وقدرة من المال(مش الراجل صاحب اجمل جاموسة ف مصر), يبقى لازم ينوبة من الحب جانب

وانا من مكانى دة ومن هذا الجروب بقول لكل اصحاب البقر والجاموس فى مصر والعالم العربى اعطوا الفرصة بقا للبقر والجاموس خليهم ياخدوا الفرصة,اهتم بيهم شوية زى ما انت بتهتم بالمدام والاولاد, يعنى حميهم كل يوم الصبح بالشامبو,وهاتلهم كريم كراميل ووديهم الساحل اشمالى,وزود لهم ف الفروت سلات حبتين ولا اقولك, اعطى لكل جاموسة مصروفها وهى تجيب اللى هى عايزاة
عشان تعود عليك بالنفع بعد كدة وتقبض زى ما قبض صاحبنا

ساعتها الواحد يتمنى انة يكون بدل الجاموسة دى.

ويبقى بقى العندليب الابيض (سعد الصغنن)كان عندة حق لما غنى وقال( بحبك يا حمار),والفنان الموقر بلبل زمانة (سعيد شرارة)كان على حق لما قال( العجل جننى)

انا زى ما قلتلكم انى مش مستغرب, طالما احنا ف بلاد( بتحط العيش على الرصيف, والجزم فى الباترينات).
وانت وانتى كمان اوعوا تستغربوا, وانتظروا المزيد
انتظروا مسابقة

اروش حمار ف العالم العربى!!!!؟

و اجمل سنة حصان!!!!!؟

واطول ديل فار!!!؟ وبعد ما يختاروا الفار الفايز تيجى قطة تاكلة وتمشى


واحسن نطة قطة


عمااااااااار يا بلادى, ولسة اللى يعيش يا ما هيشوف

الأربعاء، 5 أغسطس 2009

عزيزى النظيف (احمد بية نظيف)‏



والله دى فرصة نظيفة جدا, ان انت معانا النهاردة

انا سمعت الناس بتخترف بكلام كبير كدة يا باشا, واكيد ملوش اى اساس من الصحة
قال اية بيشككة فى نزاهة سعادتك!!!!؟
الناس دى غريبة يا باشا
مش يعزروكم مش كفاية انكم سهرانين على راحة البلد وبتلبوا مطالب الشعب نفر نفر
الناس دى حسوديا والله وقرارين
استمر انت يا باشا وملكش دعوة عشت زخرا لنا

اية يعنى عندك شقة ف المهندسين وشقة ف المعمورة وشقة ف سان استيفونو وشقة ف المنتزة, قيمة الشقة فيهم بتاع 2 مليون دولار
اية يعنى!!!!؟ هما ميعرفوش انك لسة عليك فلوس لبتاع السباكة والسيرميك و الدهان!!!!!!!؟
الا قولى يا باشا انت حاطط عندك ورق حائط ولا سايبها كدة!!!؟ عشان متزودش ف التكلفة

اية يعنى عندك فيلا ف الغردقة, مع انك كنت ساكن بالايجار؟؟اية يعنى؟؟
وجايين يتلككوا يا باشا على 18 الف متر اللى انت اخدتهم وبنيت عليهم ال 3 قصور بتوعك وبتوع عيالك

وقال اية يقولولك دى ارض زراعية ومينفعش يتبنى عليها؟؟؟ يا سلام
هو انت اخر ولا اول واحد يا باشا يبنى يعنى
وبعدين دة يادوب تكلفة التلات قصور 10 مليون بس!!!؟

وكمان انت مردتش تصرف ببزخ عليهم, عشان تعلم عيالك وتديهم درس ف الاعتماد ع النفس

لازم تطلع يا باشا وتقول للناس دى الحقيقة, تجمعهم ف مؤتمر كدة وتقولهم اصلهم مش فاهمين انك شايل البلد على اكتافك, وانك مش عايش حياة عادية كدة زينا, لا دة انت طالع عين امك

بتنزل من النجمة على الجراش وتقعد تختار ف العربية اللى هتنزل بيها الشغل, وساعات بتتعقد مش عارف تختار دى ولا دى

ربنا يكون ف العون والله يا باشا
بس الناس شاطرة تقولك عندنا 5 مليون مليون تحت خط الفقر, طب اية اللى مقعدهم تحت الخط ميطلعوا فوقة, اية اللى غاصبهم على كدة!!!!؟

واجى ابص الاقى واحد بيقولى (مقراتش عن الواد بتاع الدقهلية اللى انتحر بسبب الفقر)
والتانى يقولى نفسى اكل لحمة؟؟ لية تاكل لحمة دة حتى بتجيب النقرص ومضرة
والثالث يقولى شفت الراجل اللى قتل عيالة عشان معهوش فلوس يا كلهم ويشربهم
حاجة غريبة يا باشا والله الناس دى عقولها فست زى الكورة الكفر

مييجوا يبصوا على بورتو مارينا والساحل الشمالى وشرم ولا هما بس مش بيبصوا لا على الدويقة والقطورات المحروقة والعبارات الغرقانة والفقر

يسيبوكوا بقا ف حالكم يا باشا
وبص يا باشا اللى يقولك من اين لك هذا قولة: هذا من فضل ربى واعملة كدة بايدك يعنى خمسة وخميسة
اصل هتفهم مين ولا مين دول عبيد ياباشا

واللى غاظنى اوى يا باشا
واد حرش كدة من بتوع المدونات والاحزاب يقولك اية ؟؟ ميعمل زى رئيس وزراء تركيا ما بيعمل!؟
وقلتلة بيعمل اية هو يا خويا بتوع تركيا دة؟؟
قالى ان الراجل دة شاف ان فية ازمة وركود اقتصادى ف البلد فقرر عمل حالة تقشف, يعنى كل النواب هما اللي يحاسبوا على فواتير تليفوناتهم بنفسهم
ويحددوا استخدام العربيات الا للمسؤلين المهمين فقط, ومعدش فية حاجة اسمها اوبن بوفية لا الاكل والشرب بحساب

بس انا مسكتلوش يا باشا
وقلتلة ان التليفون اللى معاك كارت مش خط؟؟ وان العربيات اللى عندك حركة 5 & 6 كدة مش كتير عشان مشاوير الهانم والاولاد وطالبات السوق والخضار واللذى منة
وقلتلة انك بتطلب ديلفرى من عند محسن سكسكة , يعنى معندكش البذخ بتاع الناس بتوع تركيا دول

يعنى مش مقصر وحريص على مصلحة البلد اكتر منهم, وانك شغاااال يا باشا شغاااال

بس كان ليا طلب عند حضرتك ياباشا

انا كنت عرفت انك كنت نزلت اسيوط؟؟ البلد الفقيرة دى اللى ف اخر الخريطة
وعلقولك يا باشا 250 لوحة واتكلفت الليلة دى حوالى مليون جنية مع انها بلد فقيرة ومعدومة, وان فية 2 ماتوا وهما بيعلقوا اللوح دى فداك 100 واحد ياباشا

المهم يا باشا كنت عرفت ان الوفد المرافق لك كل شخص اخد شنطة فيها هدايا بحوالى 3000 جنية

انا كنت عايزك بس يا باشا تشوفلى مكان ف الوفد بتاعك دة ياباشا, اطلعلى طلعتين ف الشهر حاجة زى الفل بدل منا متبهدل كدة
وعلى راى المثل يا باشا (اللى بيتة من ازاز ميغيرش هدومة ف الصالون) قصدى( من جاور السعيد يسعد يا باشا).

ويا ريت يا باشا تهتم بطلبى دة
وعشت زخرا لنا يا باشا
اقعد بالعافية

الأحد، 2 أغسطس 2009

انتحار الرئيس المصري حسني مبارك



تفاجأ المسافرون في كراج بولمان مدينة اللاذقية على الساحل السوري، بدخول بائع صحف متجول يبلغ عمره زهاء الستين عاما يحمل أعدادا من صحفية الوحدة الرسمية


وينادي بين الركاب بخبر مفاده انتحار الرئيس المصري حسني مبارك.
والطريف في الأمر أن البائع لم يبذل أي مجهود يذكر وفي خلال دقائق معدودات من سماع المواطنين للخبر كان قد انهي الكمية التي كانت بحوزته وبثلاث أضعاف ثمنها الذي لا يزيد عن ثلاث ليرات سورية، لتكون عملية البيع هذه الأسرع من نوعها في تاريخ الصحفية المحلية لأنها من الصحف غير المقروءة بكثرة بين الناس كغيرها من الصحافة المحلية الرسمية.
وقد اختفى البائع عن الأنظار بسرعة فائقة بعد أن ترك الجميع يقومون بتقليب الصحيفة دون أي جدوى بحثا عن الخبر المذكور حتى اكتشفوا أنهم قد وقعوا ضحية لعبة شقية مارسها "تحت بنود النصب" بائع الصحف لينفق ما لديه من أعداد الصحفية، فالبعض قد شتمه والبعض الآخر قد ضحك كثيرا مما حدث , لكن العزاء الوحيد الذي يبقي ان الصحيفة ستبقى بين ايديهم حتى البيت.

اتبعتوا انتوا صح!!!؟
اية كان نفسكم الخبر يطلع صح!!؟
طويل العمر يطول عمرة ويزهزة عصرة وينصرة على من يعادية!!؟

فضلا اترك تعليقك.

الاثنين، 20 يوليو 2009

(اخص عليك يا عم جوزية)...!!!؟


السلام والرحمة على اعضاء الجروب والمدونة الكرامأسود عريض

بالصلاة ع النبى كدة, هنتكلم ف حق بنى ادم النهاردة

بس البنى ادم دة غلط(واللى غلط لازم يتربى)

اصل مينفعش واحد يجى هذا البلد المحترم, ويشرب من نيلها , ولا يمكن كان بيشرب مية معدنية محدش عارف

واكل من خيرها اشى حمام واشى بط واشى كباب وكفتة و كفيار
ومحدش يسالنى عن اخر اكلة انا سمعت عادل امام بيقولها كدة

وفبض من فلوسها بالدولارات

وبعدين اول ميطلع برة يسب ويلعن فينا؟؟طب لية كدة يا خواجة

لية كدة يا خبيبى

انتى المفروض اخرك تشتغلى سواقة

وع فكرة انا زملكاوى اة بس حقانى, وكتاب الله المجيد حقانى

نهايتة اقرؤا القصيدة دى




عم جوزيه


عم جوزيه ..بعد ما هللناله يابيه . .وعملنا منه اسطوره . كام تمثال على مليون صوره . .
حب يكون صادق ويانا ويصون العشره ويرعانا..
قال رايه فينا بصراحه ..كده بهدوء ووضوح وبراحه طب راح نزعل منك ليه . .
مليون شكر ياعم جوزيه ...............
ساله صحفى وقالة ايه ..كلمنا شويه ياجوزيه عن تجربتك والاسطوره . عن بطولاتك المسطوره
وازاى كنت شايف الصوره.. رايك فى الحدوته دى ايه وازاى ترمى العز ده كله ..وفى انجولا هاتعمل ايه وضح لينا ياعم جوزيه ......................
عم جوزيه راح قام وتنحنح.. خلع الجاكت وقعد رحرح قلت اكيد ده ناويلها ..هايردح قول ياجوزيه اشجينا و وبحبح

قال ياخبيبى اصحى صحصح انا راح اقول على رايي بجد اقفل بقك اوعى تتنح ................ انا كنت اعور بين عميان. .
اعمى عامل صحفى جبان واعمى رئيس تحرير جرنال . ..واعمى بيقدم برنامج

واعمى بيشجع بجنان اعمى ضمير ماسك صفاره . ..واعمى رئيس لجنه واداره

واعمى بيقلب فى عقود .. ..واعمى يلبى اى اشاره اعمى يساند لما انا اغلط ...

.واعمى يبرر سرقه جون واعمى يقول اخطاء بشريه . ..واعمى ويستعمى مليون ...........
اعمى رئيس لجنه حكام ومسابقات واهو كله اخوات

لو عاوز لعيب من فرقه يحضر حالا او فى ساعات او عاوز فرقه ماتكملش تنقص فورا يابشوات
اصفر احمر كارت وفات .....................

كنت حريص اضعف فى خصومى ويقولوا عنى قدير من يومى نافش ريشى اشوح واشخط وادرع واقلع فى هدومى بدرب دوله فى دوله يابيه جماهير حمرا ياشيخ بيومى ............

عيش فى الاهلى هاتفهم حاجه مصر تمللى بلد بطيخ كله يقلب كله ياباشا مولد هيصه وشغل طبيخ

مين راح يفهم وسط الهيصه اضرب نار ولع شماريخ شوف ياخبيبى لو جابوا وزه مصر الدورى بتاعها تاريخ ماهو فى بنود دستورها الدورى للاهلى والباقى فسيخ

نافس ممكن .شاكس يمكن لكن الا الدورى ياشيخ ..............

كان عندى لعيبه بتغطس فى الحمام يدونى بنالتى وكمان عندى دفنس بيرفص لو قرب للعيب ف منطقتى........

لعيب يشتم فى الحكام ويقول علشان مصر حبيبتى فيديو عقوبته بالمزاجات والله بهايم .اه يافضيحتى ..............

لما لقيت الفرقه بتسقط وخلاص بح مافيش اجوان حتى الفرقه البيضا انتخبت مجلس هايل فى الروقان بعد سنين تلطيم ومحاكم جه عباس ومشى بدنجان

وكمان سن الفرقه كبير قلت اخلع قبل الطوفان ................ من غير قمصه ورغى كتير علشان كده انا قلت حمير

شعب حكومته بتلعب بيه شغل سياسه وشغل كبير ناس بتغش بلدها يابيه وقطيع ماشى كده . طوابير حتى بهايم .جمعوا فلوسهم وعازمّنىشوفت الكرم يا عم (امير) بعد ماقلت ده كله عليهم؟ والله انا اسف قوى ياحمير


اخص عليك يا عم جوزية

بعد ما اكلوك وشربوك وخلوك اشهر من (امير) ذات نفسة, تقول عليهم عميان وحمير وكلام كدة خطير

وتتهم الحضرى انة يبيع اهلة بالمال, طب دة كلام

حد يرد حد يقولة(اخص عليك يا عم جوزية)



الثلاثاء، 14 يوليو 2009

السيد المحترم جوز هيفا هانم وهبى


سعادة الباشا جوز هيفا هانم وهبى

ازي سعادتك انا والله سعيد جدا انى بتكلم عنك النهاردة ...اة والله...دة شرف كبير ليا

انا مش عارف اهنيك ولا اعزيك بالظبط

اهنيك على جوازك من هيفا حاجة بصراحة زى الفل مفيش بعد كدة, اة وربنا, وكلة طبيعى ع فكرة,وقعت واقف يا معلم

ولا اعزيك عشان سمعت انك نزلت مصر بعد يومين من الجواز, يومين يا راجل طب لية ؟؟ وازاى؟؟
شكلك يا باشا مرفعتش راس مصر, مع ان المصرى معروف بجبروتة وقوتة
نهايتة البيوت برضة اسرار

بس مش دة برضة اللى كنت عايز اكلمك فية
انا كنت عايز اكلمك انى سمعت ف الجرايد وقرات ف التليفزيون, ايوا متستغربش اصل الخبر لخبطنى

عن شوية حاجات كدة, يعنى كانوا بيقولوا انك كنت جايب ف الفرح (150 طيارة خاصة)
يا باشا, الكلام دة بجد!!!!؟

يا باشا دة انا ماسك اصحابى واحد واحد زاللهم عشان ركبت طيارة وانا عندى 3 سنين, وانا جاى من العراق, محسسهم انى من كوكب اخر, تقوم تقولى 150 طيارة
دة كلام يا باشا, الا قولى يا باشا هما كانوا بيجملوا من الموقف ولا من ع الطريق!!؟
طيب قطعوا كارتة من عند عم عماد !!!؟

يا باشا الطيارات دى كان ممكن تحرر فلسطين, وتفتح عكة اة وربنا زى ما بقولك كدة

طب اية حكاية ال 9 مليون دولار دول يا باشا!!؟
دة الواد معاذ وهو بيقراء ليا الخبر عيط , بقولة مالك يا ابنى قالى اصل جوازتى واقفة على 2000 جنية, تقوم تقولى 9 مليون دولار(طب دول ييجوا كام الفين جنية دول)!!؟

طب أقولك حاجة تضحك و الله ولا ليك عليا حلفان من كام سنة بس مصر كلها كانت بتدور على صورة جادون تجت كل غطيان الحاجة الساقعة عشان يكملوا بيها صورة عجلة و يكسبوها .جادون يا باشا ..حلمنا القومي كان جادون ..تقولي إنتا 9 مليون ؟

اصل موضوع الملايين دى مش هنا, دة حتى على ميلودى تريكس اللى هما بيقولوا عليها بتتحدى الملل دى وهى الملل كلة, كان فية سؤال ان المليون فية كام صفر؟؟
وحياتك عندى محد عرف يجاوب(الا صحيح يا باشا هو فية كام صفر)!!!؟

انا مش هقولك يا باشا ان مفيش ف مصر اصحاب ملايين, لا موجودين يا باشا بس مش بيتكلموا ف المواضيع دى قدام الشعب خالص يا باشا عشان الحسد والقر واللذى منة

اصل يا باشا لو اتكلموا ف المواضيع دى ممكن ييجى يوم و حد من الناس المغرضين اللي زينا اللي عينيهم تندب فيها رصاصة يلف حوالين نفسه حزام ناسف و يفجر نفسه فيهم والا حاجة..

يعنى واحد مثلا من ال 5 مليون اللى تحت خط الفقر دول اللى مش بيشوفوا اللحمة الا ف ورق الجرايد والمجلات

( الا صحيح يا باشا هما التسعة مليون دولار دول يجيبوا كام كيلة لحمة بتلو صافى!!!؟)

أو الملايين اللي قاعدين على القهاوي من غير شغل ..أو الملايين اللي مش عارفين يشربوا كوباية ماية نضيفة ..أو الملايين اللي مابيعرفوش يجيبوا رغيف عيش من أي فرن ..أو الملايين اللي عندهم سرطانات و فيروس سي و بيموتوا عشان مش لاقيين تمن العلاج..و غيرهم و غيرهم..

هي دي الملايين اللي احنا نعرفها يا باشا لكن ال9 مليون دولار دول و حياتك انتا مانعرفهم..ولا عايزين نعرف ... بناقص يا باشا

بص يا باشا اصرف براحتك, وارمى هنا وهناك, بس متبقاش محدث نعمة يعنى
متبقاش تقول يا باشا, اصل احنا بنركب الهوا بسرعة واعصابنا خفيفة

بلاش تصيح ف الجرايد والمجلات, مش كفاية مراتك يا باشا الست هانم هيفا
(رفع الله قدرها) جابت احباط لبنات البلد كلهم, اة والله محبطين يا باشا, دة حتى البنت بتاعتى (الله يحرقها) مش لاقية فلوس تكمل الجهاز بتاعها, تقوم تيجى انت يا باشا والست هيفا وتقولولى 9 مليون , لا واية مش مصرى بالدولار يا عنية

بس يا باشا الشهادة لله الست هيفا بتاعتك عاملة شغل ناااار ف (دكان شحاتة)بصراحة زين ما اختارت

قولى يا باشا هى اتباست كام بوسة ف الفيلم؟؟

وكان بوس هادف ولا مش هادف؟؟

وكان هيفرق معاك يا باشا لو اتفرجت على الفيلم قبل ما تتجوز ولا عادى يعنى!!!؟

نهايتة يا باشا,خصيمك النبي يا باشا داري على شمعتك توهوج ..بدل ما نوهوج إحنا يا باشا و ربنا يخليك و يهدي سرك ياااا رب ..

اسيبك انا بقا يا باشا تلحق تتفرج على (دكان شحاتة) انا عارف انة فيلمك المفضل.

الأحد، 21 يونيو 2009

ذكرياتى مع الموبايل


السلام والرحمة على اعضاء المدونة الكرام
الموبايل
طبعا الموبايل الوقتى لغة العصر, محدش مش معاة موبايل,طب دة انا شفت الواد هيثم شايل موبايل فية كمرتين اة والنعمة زى ما قلتلكم كدة
واقعدت اتحايل علية , اخد الموبايل يومين اتمنظر بية ع البنت بتاعتى, مرضاش الندل
انا اساسا لية ذكريات زى الزفت مع الموبايلات
من 5او6 سنين كدة جبت الموبايل
يعني بقالي 6سنين جايب خط ... وبرده

بقالي 6سنين عمال انزل فى نغمــات .... نزلت كل نغمات الدنيـا لموبايلي

.... دا على اساس أنه لما يرن النغمـه دي تشتغل ...

و من هنا بقى ظهرت المشكله .... إنه يرن .... الموبايل مابيرنش خالص ...
انا قلت يمكن العيب من الجهاز .... غيرت الجهاز ..طب من الخط....غيرت الخط

.... طب ممكن من النغمــه .... غيرت النغمــه

عملت كل المحاولات عشان أسمع نغمـة موبايلي بترن من غير ما اشغلهــا انا ...

بس مفيــش فايده.. كل محاولاتي كانت نتيجتها بالفشــل..
وفى اليوم الموعود كنت نايم , قمت من النوم على رنة موبايل, قلت لا دة حلم, نام يا امير دة اكيد حلم
لكن مطلعش حلم , وربنا مكنت مصدق, قلت بس الدنيا ضحكتلك يا ميرو يا جامد
ورحت ارد على الموبايل ويا ريتنى ما قمت, لقيت اختى بتقولى/ سورى يا امير موبايلى باظ فحطيت شريحتى ف موبايلك
اصل انت مش بتستعمل التليفون.
بنت الاية بتغيظنى, ربنا يسامحها
وتحطمت نفسيا بجد, كل لما امشى ف حتة, الاقى الناس موبيلاتها بترن وانا لا طب ليييييية؟؟
ودعيت ربنا وكشفت راسى واتجهت للقبلة وقولت يا رب لو كنت بتعاقبنى على ذنب, فانى تبت اليك ورجعت
وفى يوم كنت راجع من الكلية لقيت عبد الحليم بيغنى وبيقول (موعود), ادور حواليا مش لاقى حد مشغل حاجة ولا حاجة
اتارى دة الموبايل بتاعى (اصل انا واد رومانسى شوية)مكنتش مصدق , قلت يا ربى دة حلم ولا علم, احمدك يا رب
واتكيت على الزر الاخضر اللعين , ولسة هقول الووو, لقيت واحد بيقول(/ ايوا يا سوزى يا حبيبتى انا واقف مستنيكى قدام شباك التذاكرف
السينما, انتى نسيتى ولا اية يا روحى)
يا اخى ربنا ياخد روحك انت وهى ف ساعة واحدة, وعرفت ان النمرة غلط.
ومن ساعتها وانا جت لى عقدت الموبايل, بقيت مريض نفسيا, وبابا يجيب ف دكاترة, وبرضة مفيش فايدة
وبعد ما قعدت ف اوضتى فترة طويلة مع نفسى, ومخاصم الدنيا والناس, قررت انى خلاص
اسيب الحالة اللى انا فيها دى, وابدا انفتح عن الناس وانسى حكاية الموبيلات
وطلعت اتفرج ع التليفزيون
لقيــت التلفزيون حتى بيعند معايا , قلبت ع القناة لقيت

إعلان لموبايل... حاولت اقلب القناه عشان ما افكرش.. لقيــت إعلان عصام

الحضرى بتاع فودافون....

حاولت أقلب القناه عشان ما افكرش في المــوبايل ....لقيـــت إعلان نغمات فيديو تون...

الإعلان دا أثر فيــه اوي...هو انا حتــى طايل نغمــه عاديه عشان يجبلي

فيديو توووون .... الإكتئــاب رجعلي تاني .....
وقررت انى خلاص
لا موبيلات بعد الان, ولسة هفح الشباك عشان ارمى الموبايل
سمعت الموبايل بتاعى بيرن , معقوووووول
كانت نغمة الرسايل
فتحت الرسالة لقيتها بتقول
("عزيزي العميل دلوقتي ممكن تشترك في خدمة الإنتــظار عشان إللي بيتــصلوا بيـــك وانت مشغـــول......")
قلت يا خرااااااابى , يا لهوووووووووى, الناس دى عايزنى انتحر
وقمت فاتح الشباك وراميت الموبايل, نزل على دماغ واحد وهو ماشى وعورة وقعد يشتم فيا, وقالى (ودينى لعمل فيك بلاغ)
استى بس يا عم, مفيش فايدة
وهى ساعة زمن, ولقيت عسكرى جاى ومكلبشنى ورحت مركز الشرطة, وعشان الراجل يتنازل عن البلاغ , دفعت 150 جنية.
يعنى موت وخراب ديار
وهى دى حكايتى مع الموبيلات!!!!!!؟


منقول مع التعديل

السبت، 20 يونيو 2009

حكااية رؤساء امريكا الحيوانات, قصدى مع الحيوانات.!!!؟


لرؤساء أمريكا السابقين نوادر وحكايات طريفة مع الحيوانات..
ونذكر منهم الرئيس وليام "هوار تافت" الذي دخل البيت الأبيض منذ ما يقرب من قرن وكان يربي "بقرة" في البيت الأبيض ليحصل منها على اللبن طازجاً، في وقت لم تكن فيه المعلبات وعلب اللبن قد ظهرت بعد.. وهو الأمر الذي فسر عدم اهتمام الرئيس تافت على السفر إلى بقية الولايات ومغادرة البيت الأبيض، لصعوبة شحن بقرته المفضلة لتكون في خدمته دائماً!!

أما الرئيس "وودرو ويلسون" فكان يهتم أكثر بتربية الأغنام .. وكان مشهداً عادياً أن تقتحم عنزة حجرة الاجتماعات بالبيت الأبيض وتسرح بين المقاعد وتستمع إلى ما يقال في تلك الاجتماعات دون أن يجرؤ أحد على إخراجها أو إغضاب الرئيس.. على حين كان ممنوعاً منعاً باتاً على الصحفيين حضور نفس الاجتماعات.(ممنوع دخول الصحفيين واهلا بالمعيز)

أما الرئيس أندرو جونسون فكان مغرماً بتربية أسرة من الفئران، وكان مكانها المفضل جيبه أو تحت قبعته.. وبالطبع كان مسموحاً لها بالتواجد في كل مكان، ولو كان يحمل عبارة "سري جداً" وهو ما لم يكن مسموحاً لنصف رجال الرئيس على الأقل! ويقول بعض الخبثاء إن هواية الرئيس أندرو بتربية الفئران كان سببها تراث العائلة القديم، فقد كان جد الرئيس يعمل حاوياً.. وكانت تربية الفئران لعبته المفضلة.

أما الرئيس "ليندون جونسون" والذي ساعد إسرائيل أكبر مساعدة في حرب (67) فله حكاية مؤسفة مع الحيوانات فذات يوم غضب من كلبه لأنه بال على حذائه – وكانت إسرائيل تفعل ما هو أكثر من ذلك – فغضب جونسون وشد أذن كلبه الذي عوى متألماً.. ونشرت الصحافة الخبر المؤلم – في وقت كان يُقتل فيه آلاف الفيتناميين دون ذنب، .. ولم تفلح كل محاولات جونسون لكسب ثقة شعبه مرة أخرى.. بالرغم من أنه ظهر وهو يقبل كلبه ويحتضنه ثم وهو يقوم بتحميمه بالشامبو كذلك.

أما الرئيس فرانكلين رزفلت فكان أكثر ذكاء، فعندما مات كلباه المفضلان في حادث سيارة، قام بدفنهما في مقبرة العائلة قائلاً في صوت حزين إنهما يعتبران من أفراد العائلة ولذا يجب دفنهما في نفس المقابر، وهو ما جعله يضمن فترة رئاسة ثانية.. ولكن الروس كعادتهم اتخذوا من الأمر تشنيعة على روزفلت، وقالوا إن دفنه لكلبيه في مقبرة العائلة، يكشف عن السلالة التي انحدرت منها عائلة الرئيس!

وقام روزفلت بعدها بتربية (كانجرو) كان مشهوراً بقفزاته، وكان روزفلت يؤكد للروس أنه يوماً ما سيقفز على نظرياتهم الشيوعية ويهدمها.. ولكنه مات قبلها، وقد حقق ذلك "جورج بوش" دون الحاجة إلى كانجرو.. فقد أدى كلبه المهمة المطلوبة.

أما الكلاب والقطط بالذات فلها حكايات داخل البيت الأبيض ومع رؤساء أمريكا السابقين والحاليين.. فقد كانت كلبة "بوش" أشهر من نار على علم، وكان اسمها "ميلي" وكان دائم الحرص على وجودها معه في كل مكان واصطحابها إلى الأماكن التي يقضي فيها اجازاته.. وذات مرة شوهدت الكلبة "ميلي" أثناء محادثات نزع السلاح النووي من أوربا وهي تطارد قطة شرسة وتقهرها، فخرج المحللون ليؤكدوا أن ما حدث لهو أكبر دليل على أن أمريكا ستقهر روسيا في محادثات نزع السلاح.. وقد كان بالفعل! ولهذا فليس غريباً أن أحد الصحفيين ألف كتاباً عن هذه الكلبة باع منه خمسة ملايين نسخة وكسب مليون دولار !(يا صلاة النبى, يا ريتنى انا كتبت عنها اى هوهوة )

أما الرئيس المنتخب "كلينتون" فكان يمتلك كلباً ولكنه مات في حادث فاقتنى قطة تدعى "سوكس" بدلاً منه، وقد نصحه خبراء الدعاية أثناء الانتخابات بالتخلص من قطته واقتناء كلب باعتبار أنه ومنذ عام 32 كان كل رؤساء أمريكا السابقين يمتلكون كلاباً عدا اثنين هما "فورد" و "كارتر" اللذان لا يذكرهما أحد.. ولكن كلينتون أصر على وجود القطة.. وعندما فاز أدرك المحللون أن ثمة تغييراً قد حدث في مزاج الشعب الأمريكي.. وفي النظام العالمي كذلك.. وان عصر القطط سيفرض نفسه على العالم.. ولسنين طويلة قادمة!
ولكن جاء الرئيس" اوباما".. وكلبة الابيض المدلل,الذى يعتبرة مثل طفلة, ويخاف علية من نسمة الهوا الطاير.(وللكلاب حظوظ)
وكانت دى حكاية قبل النوم عن( الحيوانات ورؤساء امريكا)
تصبحوا على خير يا شطار....



منقول مع التعديل


قرب قرب قرب الفار عندنا ب جنية واحد بس.


كان تكاثر الفئران في إحدى المحافظات الساحلية بشكل غير عادي عجزت عن ملاحقته قطط المحافظة..
ولما فكر البعض في أن الحل هو استيراد قطط من الخارج لتأكل هذه الفئران احتج البعض بأن هدف الدولة هو زيادة الانتاج وليس زيادة الاستيراد !(مهو باين خالص)

وهكذا تفتق ذهن أحد مسئولي المحافظة بحل عبقري يتمثل في ذلك الاعلان الذي أصدره ديوان المحافظة وينص على أن المحافظة ستشتري كل فأر يتم صيده داخل حدود المحافظة بجنيه واحد لا غير !(الحق يا جدع)

ولم يكن المسئولون في المحافظة يدركون أنهم سيلاقون مثل هذا النجاح العظيم لهذه الفكرة، فقد فوجئ المحافظ بنصف موظفي الديوان يتقدمون إليه باستقالاتهم، فسألهم في ذهول! انتوا عاوزين تستقيلوا ليه؟
فأجابوه في صوت واحد علشان نصيد فيران ونزوّد دخلنا. شوف بقى لو الواحد مننا اصطاد خمسين فار في اليوم على الأقل. دخله يبقى كام في الشهر؟(والله فكرة!!!؟)

وفي نفس اليوم فوجئ المحافظ بكل الذين كانوا قد تقدموا بطلبات للحصول على إجازة للسفر للخارج للعمل، فقد قاموا بسحب اجازاتهم وقدموا بدلاً منها طلبات إجازة في الداخل.. ليمتهنوا صيد الفئران باعتبارها تجلب أرباحاً أكثر من العمل في الخارج!

ليس هذا فقط.. بل إن المدارس التي كانت تشكو من تكدس التلاميذ بحيث كان كل أربعة أطفال يجلسون على دكة واحدة، فوجئ مفتشو ونظار المدارس بخلوها من التلاميذ. فلما استقصوا عن السر في الأمر اكتشفوا الاجابة المذهلة.. وهي أن التلاميذ ذهبت لصيد الفئران!

وكنتيجة منطقية فقد تخلصت تلك المدينة الساحلية من البطالة بين خريجي جامعاتها.. إذ كيف يكون هناك بطالة في بلد ما، ثمن الفأر فيه جنيه مصري واحد؟(قرب قرب قرب الفار عندنا ب جندى واحد بس)
ليس هذا فقط.. بل إن حركة السياحة الداخلية في ذات المحافظة قد نشطت بطريقة لم تعرفها من قبل ، إذ امتلأت كل الفنادق والبنسيونات برواد المحافظات الأخرى، وبالطبع فلا بد أن تخمن السبب، في أنهم جاءوا لصيد الفئران وتحسين دخولهم!

وكل هذه الأسباب دفعت مسئولي المحافظة للتفاخر بين اقرانهم بأنهم بواسطة ذلك الحل العبقري فقد تخلصوا من مشكلة البطالة والكساد السياحي وتكدس التلاميذ في المدارس وتكدس الموظفين أيضاً.. ذلك كله كان بذلك الحل الجهنمي.. وهو جنيه واحد لكل فأر يتم صيده !

بل وقامت بعض شركات السياحة بتنظيم رحلات سفاري للأجانب في المحافظة الساحلية للتمتع بصيد الفئران في أماكن تواجدها الطبيعية!

ولكن المؤسف أن الشيء الوحيد الذي لم تستطع المحافظة التخلص منه كان هو الفئران..( يا فرحة ما تمت) فنظراً للمكاسب الهائلة التي كان يجنيها صيادوا الفئران.. لذا قام بعض أصحاب مزارع الدجاج والماشية في المحافظة بتحويل نشاطها سرا إلى تربية الفئران باعتبارها ذات أرباح مضمونة ولا تتكلف تربيتها شيئاً.. وأنشئت لذلك عدة شركات استثمارية برأسمال أجنبي مصري مشترك.. وهذه النتيجة بالطبع لم تكن في حسبان من أعلن شراء الفأر بجنيه واحد.. لأنه كان يريد التخلص من الفئران وليس تربيتها لبيعها بعد ذلك، وهكذا أصدرت المحافظة أوامرها بعدم شراء فئران تلك المزارع، ولكن كيف كان يمكن لموظفي المحافظة المساكين المسئولين عن شراء تلك الفئران، في التمييز بين الفئران الضالة والأخرى التي تُربى في المزارع؟

وحتى عندما حاولت المحافظة القيام بحملات بوليسية لمداهمة مزارع تربية الفئران فإنها فشلت في ذلك، لسبب بسيط وهو أن بعض كبار رجال المحافظة كانوا يشاركون سراً في رأسمال تلك المزارع الفئرانية!!(كوووسة)

نتيجة أخرى لم ينتبه إليها المسئولين عندما أعلنوا أن الفأر بجنيه ربما بسبب جهلهم بالقاعدة الاقتصادية التي تقول أن سعر الشيء يتحدد حسب ندرته والعرض والطلب ليه.. ولأن الفئران في المحافظات الأخرى كانت لا تساوي ثمن رشة المبيد القاتل لها، في حين أنها تساوي جنيهاً كاملاً في تلك المحافظة الساحلية .. ويعد خصم نفقات السفر والإقامة فإن الربح يكون كبيراً دون شك.

ولأن البعض كان وقته لا يسمح بالسفر – وإن كان يسمح بصيد الفئران – لذلك ظهر بعض السماسرة الذين كانت مهمتهم تنحصر في شراء الفئران من كل المحافظات بالجملة وبسعر خصم مناسب، ثم بيعها في تلك المحافظة الفأر بجنيه!

ولما تنبهت المحافظة الساحلية لتلك التجارة، قامت بإغلاق حدودها مع المحافظات الأخرى لمنع دخول الفئران الغريبة، فلجأ صائدوا الفئران من المحافظات الأخرى والسماسرة إلى تهريب تلك الفران إلى المحافظة الساحلية بوسائل لا تخطر على بال، فمنهم من كان يقوم بتهريبها عبر البحر ليلاً.. ومنهم من كان يصنع صُرة مكونة من خمسين فاراً لتشدها زوجته على بطنها وكأنها حامل ليتم تهريبها.. ومنهم من استعان بخبرة تجار المخدرات في هذا المجال!

وهكذا اضطر مسئولو تلك المحافظة الساحلية آسفين لاعلانهم أنهم لن يشتروا فأراً واحداً بعد اليوم..
فكان أن توقف الموظفون والتلاميذ والعاطلين عن صيدها.. وأطلق أصحاب مزارع الفئران فئرانهم.. وفعل المهربون نفس الشيء فتضاعفت أعداد الفئران في المحافظة عما كانت من قبل عشر مرات.. وهو الأمر الذي جعل مسئولو المحافظة يفكرون في الحل الأول.. وهو استيراد القطط من الخارج لصيد الفئران.. القطة بعشرة جنيهات.. وهو ما يستعد له البعض من الان بإنشاء مزارع لتربية القطط !!
_________
وهى دى سياسة البلد عندنا(عمار يا مصر)_________


منقول مع التعديل

والله وعملوها الرجالة!!!؟‏

السلام والرحمة على اعضاء المدونة الكرام

شوفتوا اللى حصل؟؟ اكيد محدش ف مصر مشفش اللى حصل
دة حتى (نينا) قعدت تزغرت!!!؟ وبقولها بتزغرتى لية يا حاجة؟ 

قالتلى : اشل حمش يا ابنى جاب جوون

اسمة حمص يا نينا مش حمش!!!؟

قالتلى: اهى كلها تشالى يا ابنى ههههه

لا بصراحة منتخبنا الوطنى اثبت ان انة منتخب الابطال؟؟
وحسن وشحاتة سطر اسمة كاحسن مدرب ف تاريخ مصر, وان جيل اللاعيبة دة الجيل الذهبى لمصر
سطرنا التاريخ قدام البرازيل رغم الخسارة, وكسبنا احترام العالم جميعا
اننا مش مجرد كمالة عدد ف البطولة
وهزمنا ايطاليا شر هزيمة, عارفين يعنى اية ايطاليا
ايطاليا دى احنا واكلين منهم 5 قبل كدة, عرفناهم ان المصريين يعرفون من اين تؤكل الكتف.
الف مبروك لمصر وللمنتخب المصرى, وعقبال لما نحتفل بالفوز على امريكا



تعليقات ما بعد المباراة

(اكونتا) المهاجم الايطالى المدلل كان نازل الملعب بيبص فووق عارفين لية؟؟

كان بيدور على كلمة (مباشر)!!!؟ههههه


(جاتوزو:) لالالا انا محدش عمل فيا كدة قبل كدة.

(روسى): هو الحضرى دة اية يا جدعان مبتهدش!!!؟


(حمص): يا جدعااان انا كنت حاسس وربنا وقلت لاحمد حسن كل مرة قبل الماتش, ادينى واحد سجق وواحد حواوشى وملكش دعوة.

(بوفون): واتارينى ماسك الهوا بايديا , يا حبيبى, ماسك الهوا

(حسن شحاتة): بصوا يا رجااالة براحة على امريكا شوية , اعملوا حساب ان الناس دى بتدينا معونة, ولا اية يا شوقى.

(شوقى غريب): اللى تشوفوا يا معلم.


(جاتوزو): شوفتونى وانا ملط؟؟؟ها؟؟ اجنن وانا ملط, الله يسامحك يا ابو تريكة, لازم تتزحلق وكل حاجة تبان, يا جدع دة انتوا مسلمين حتى.


(ابو تريكة): ناس بتحط نفسيها ف مواقف باااايخة.


(زيدان): مى دى وش السعد وربنا , روحى يا شيخة ربنا ميحرمك منى, امؤؤؤ

مدرب المنتحب الايطالى: كان يوم اسود ومهبب بستين نيلة, انا اية اللى جابنى مع العالم دى؟؟ 

بيرلو: بيرلو ابن المعلم زناتى اتهزم يا مينز 

الخميس، 18 يونيو 2009

استعجلتى الرحيل.


استعجلتى الرحيل


استعجلتى الرحيل وتركتى خلفكى اذيال من هموم الملمها

تركتى

هم و كرب وغم وااة


ورغم كل ذلك

حين سؤلت عن حبك,قلت, انة احلى الاقدار

استعجلتى الرحيل

يا من

شربت من راحت يديكى

وجعلت من زفيرك شهيق لى

وكنت اجوب العالم ببريق عينيكى

استعجلتى الرحيل

يا من

كانت وسادة راسى اضلعكى

وكنتى تمحى همى بلمسة واحدة من اصبعكى

استعجلتى الرحيل

بحثت عنكى فى كل مكان

فوق الارض وفى الشطئان

سالت الانس وسالت الجان

وبلا جدوى

لقد تبدلت لدى المفاهيم!!؟

هل الحب نعمة ام نقمة؟

هل هذا قلبك ام قلبى؟

هل انتى حقيقة ام سراب؟

كنت قديما اكتب الشعر عن العشاق

اصبحت الان حديث العشاق

اصبح حالى ليس بحال!!؟

علمتينى يا سيدتى؛

ان للفجر اذان وللحب زمان

ولكن لم تدركى يا سيدتى ان للرحيل اوان 

استعجلتى الرحيل....


الفرق بين مواطن اسمه /عمر الطويل ومواطن اسمه /طويييل العمر‏!!!?


ما هي الفوارق بين
المواطن عمر الطويل وطويل العمر؟؟؟؟؟
ا - المواطن عمر الطويل ولد فى المستشفى حكومي
طويل العمر ولد فى مستشفى بورتو مارينا السياحى

2- عند الولاده حصل
طويل العمرعلى مرتب شهرى اربعون الف جنية شهريا
المواطن عمر الطويل حصل على بلهارسيا وانميا البحر المتوسط بالمستشفى بسبب العدوى

3- طويل العمرذهب للدراسه فى امريكا فى مدرسه داخليه
عمر الطويل ذهب للدراسه فى مدرسه بن جحش
عند الاستاد حسن يفرك ودنة والاستاذة سميرة سبانخ

4- طويل العمرابتعث للدراسه فى جامعه هارفارد
المواطن عمر الطويل ابوه كل ما يروح مناسبة
يسال  اللى جنبة متعرفش اى حد ف الجامعةّ؟؟؟؟؟

5- تخرج طويل العمرمن الجامعه لان والده يملك كرسى بالجامعه
المواطن عمر الطويل تخرج من كليه التربيه بعد انتظار 4 سنين فالبيت
اصل البيت المكان الوحيد اللى قبلة!!!
6- تم تعيين طويل العمرمستشار على المرتبه.........
المواطن عمر الطويل بعد انتظار
سنتين فالبيت تم تعيينه مدرس فى قريه تبعد عنها الكهرباء مسيره يوم وعلى
بند الاجور!
7- طويل العمر ارسل لجنه كشفيه نسائيه للمجتمع للبحث له على عروسة, باى تمن
المواطن عمر الطويل اخبر والده برغبته فى الزواج
فقال له والده اصبر سنتين او تلاتة واجمع المهر وانا اجوزك بنت عمك عبلة , هى عرجة اة بس بتشوف كويس
8- طويل العمر تزوج الجوهرة وطلقها بعد اسبوعين واخذ نورة وطلقها بعد سنتين
واخذ بعدها غاده وهيفاء.. ونوف اللي عمرها 18
المواطن عمر الطويل تزوج عبلة بنت عمه  بعد سنيين
وكل ماشافها الصبح وهى صاحيه من النوم اتفزع واتصدم ميعرفش اذا كانت دى بنت عمة ولا ابن عمة وتحسف على دم قلبه وترحم على ابوه

9- بعد ثلاثين عام المواطن عمر الطويل اصبح فريسه للامراض من ضغط وسكر وربو
و طويل العمر من جلطه لجلطه!
10- توفى طويل العمر فى لندن
وتوفى المواطن عمر الطويل فى ممر المستشفى من الاهمال ولعدم وجود سرير شاغر

11- تم دفن 
طويل العمروالمواطن عمر الطويل فى مقبره واحده
الغريييب بالموضوع ان البدايه مختلفه بس النهايه وحده ويااا بخت اللى عنده رصيد لما بعد النهايه

واللى معهوش يبقى يشحن.....


الأربعاء، 17 يونيو 2009

(طويل العمر يطول عمرة ويزهزه عصرة وينصرة على من يعادية.. هاى هىء)!!؟‏


السلام والرحمة على اعضاء المدونة الكرام

ليلة امبارح مجانيش نوم... لا مش اغنية سيد درويش, فعلا امبارح بعد مرجعت من الصالة,طبعا هتسالونى : انت سايب البيت كلة يا عم امير وقاعد ف الصالة؟؟
لا يا جدعااان الصالة دى قهوة شبابية بنقعد عليها انا واصحابى , بس انا بتحرج اقول قهوة يعنى, مكانتى العملية والعلمية تمنعنى من ذلك. احم احم

المهم: رجعت وغيرت هدومى وجيت انام , مش جايلى نوم, وفين وفييين على ما جانى نوم.

ولما نمت حلمت خير اللهم اجعلة خير
انى قاعد مع اصحابى ع الصالة(القهوة) وقولتلهم انا اخترعت الة السفر عبر الزمن!!!؟

طبعا اللى شتم ...واللى ضرب ...واللى بص بقرف...!
قولتلهم لو مش مصدقين تعالوا معايا البيت!!!؟ وانا اسافر بيكم بالزمن
وبالفعل, اخدت اصحابى ورحت البيت وطلعنا اوضتى
وفرجتهم ع الالة, كانوا منبهرين جدا
وجة الواد هيثم الرخم وقالى عايزين نطلع 50 سنة لقدام
قولتلة بلاش يا هيثم؟ 
قالى لا والله لنسافر 50 سنة قدام عشان نشوف احوال البلد
انا بينى وبينكم مكنتش عايز, عشان كنت حاسس ان حاجة هتحصل.
قلتلهم ماشى, اصل بصراحة مقدرش استغنى عن عمرى واخالف اوامر هيثم؟
اصل هيثم دة من فصيلة الفراعنة, حاجة كدة محصلتش قبل كدة , طول وعرض وهيبة, دة كفاية كف ايدة بس, كان مشروع جزمة وفشل.

قلتلهم يلا, الكل يربط الاحزمة ونتكل على الله.

وظبط الزمن بتاع الالة على سنة 2059 , والمكان: مصر, والمدة 24 ساعة
وبالفعل, رحنا سنة 2059 , وجيت ابص لقيت نفسى قدام تمثال سعد باشا
قلت الحمد لله, انهم لسة باقيين على سعد باشا ومطلعهوش حرامى ولا حاجة

ولقيت محمود , محمود دة صاحبى برضة يا جماعة بس مثقف شوية زى حالاتى كدة
بيقولى متشوف لينا راديو يا عم امير؟؟
قولتلة لية يا حودة خير؟؟
قالى اصلك لما تحب تعرف ثقافات الشعوب تفتح الراديو وتقلب ف المحطات
قلتلة والله عندك حق يا حودة

وطلعت الموبايل بتاعى ابو كمرتين دة , وجبت الراديو
وجبت اذاعة باريس
ولقيت واحدة بترطن بالفرنساوى, فيما معناة
ان فرنسا اسست مستعمرة قمرية,(فوق القمر يعنى), ولكن عندها مشاكل ف الصرف الصحى ....

قلت والله كويس فرنسا بنت ع القمر عقبالك يا امى(مصر يعنى).!!!.


نقلت على اذاعة السودان
لقيت المذيع بيقول:مظاهرات حاشدة ف العاصمة السودانية بسبب سقوط الرحلة رقم 45654 للمريخ, ومقتل كل من ف الرحلة, والمظاهرات تنشد بعزل الحاكم, والوزارة.

قلت والله عاااااااال , المريخ مرة واحدة دة اكيد مصر بقا طلعت المشترى!!!.


نقلت على اذاعة الشرق الاوسط المصرية من المقهورة(القاهرة سابقا).

ويا ريتتنى مقلبت

*لقيت الاغنية هى هياها شغالة.!!!(وعشان كدة احنا اخترناك)*

(وعشان كدة احنا اخترناك)


(وعشان كدة احنا اخترناك)



قلت: كفااااااااااية, حرااااااااااااام.
ياااااااااة, بعد خمسين سنة, دة الناس طلعت القمر وعدت ع المريخ
وانت لسة موجود, لا واية بنغنيلة اغنيتة المفضلة.

ولقينا عربية امن مركزى معدية علينا واحنا واقفين.
فقلنا ف نفس واحد
(طويل العمر يطول عمرة ويزهزه عصرة وينصرة على من يعادية.. هاى هىء)
بص لنا اللواء من الشباك, وعملنا بصابعة كدة, يعنى تمام , استمروا.

وصحيت من النوم وانا بقول(هاى هىء...هاى هىء)!!!!!!.

دة مكنش حلم يا اخونا, دة كان كابووووووووس طخين

انا عارف ان احلامى رخمة, بس ادعولى تتظبط عن كدة
مع تحيات/ امير وبس