الجمعة، 24 ديسمبر 2010

(كـــــــــــــلام ف ســــــــــــرك)

السلام عليكم ورحمة الله وبركاته

(كـــــــــــــلام ف ســــــــــــرك)

*بعد مهزلة الانتخابات بقترح على المجلس الموقر وعلى الدكتور احمد فتحى سرور ان يلغى كلمة(الموافق يتفضل برفع يده)  ويخلى مكانها(قشطه يا جماعه ولا مش قشطه؟؟) والرجاله ترد عليه وتقوله(قشطه يا ريس) وخصوصا ان مفيش حد هيقول مش قشطه ولو حتى حد قال مش هيتسمع لانه هيبقى نفر ولا اتنين ف وسط 500 عضو.


*اثبتت العلاقه الوطيده بين مصر واسرائيل والتى تعتمد على مبدأ (خد وهات)ان اسرائيل قالت لنا الاول (هات) واحنا بسلامة نيه اديناها الغاز بتاعنا وطلعنا كرماء  اخر حاجه معاها, اثارنا الغاز على انفسنا انطلاقا من قول الله تعالى(ويؤثرون على انفسهم ولو كان بهم خصاصه)لدرجة ان امى امبارح ملقتش غاز تعملى كباية عصير الجوافه السخن بتاعى,واستنينا ان اسرائيل تدينا اللى احنا اتفقنا عليه وبالفعل اديتنا اسرائيل على60 قلم على قفانا,وذلك بعد اكتشاف شبكة جاسوسيه ف مصر كانت تتجسس لصالح اسرائيل,والله عمار يا مصر يا ام الدنيا.


*طبعا احنا عارفين ان مجلس الشعب لازم يكون نصه من العمال والفلاحين والنص التانى فئات
كل ده جميل نيجى بقا لتعريف العامل والفلاح بنص الماده
الفلاح:الفلاح حسب نص الماده هو من تكون الزراعه عمله الوحيد ومصدر رزقه ويكون مقيما بالريف
اما العامل:هو من يعتمد بصفه رئيسيه فى دخله على عمله اليدوى او الذهنى فى الزراعه او الصناعه او الخدمات(ولا يكون من حملة المؤهلات العليا)
وركزوا الله يكرمكم ف اخر حته دى,نيجى بقا للعمال والفلاحين بتوعنا ف مجلس الشعب نشوفه بيشتغلوا ايه؟؟
خد عندك يا سيدى(رجال اعمال-مفتشين بمجالس نيابيه-حاصلين على الدكتوراه-بكالريوسات الدنيا والاخره-مديرين عام بالمديريات)
لغاية كده وهقولك يا اخى عديها لكن اللى فرسنى بقا ان عدد كبير منهم عنده عضويات فى اندية الاهلى والجزيره,انا مش متضايق علشان انا زملكاوى والله ,ولكن فى فلاح او عامل ف الدنيا بيبقا عنده عضويه ف انديه بالاف الجنيهات!!!؟ ليه فلاحين ف
الكونجرس!!!؟


*لفت نظرى تعليق الرئيس مبارك على انشاء المعارضه لبرلمان موازى بعد عدم نجاحهم ف الانتخابات
قال ايه الريس؟؟
قال وهو مبتسم كده وغاسل سنانه(سيبوهم يتسلوا)!!؟
وانا من هذا المزنق بدعو السيد الرئيس جمال مبارك,لالا,قصدى الرئيس محمد حسنى مبارك
انه ينزل للشعب مع التموين (لب سورى وفول سودانى) للتسليه علشان الشعب يتسلى هو كمان ولا يعنى المعارضه احسن مننا؟؟



*سمعت والله اعلم ان مصر هتستخدم الانسان الالى فى اجراء العمليات الجراحيه
يا رب طبعا يكون الخبر ده كذب وافتراء,لان لما الانسان الالى هييجى طبعا هيتعدى من العقليه المصريه الفتاكه,وقبل ما يخلص العمليه هيقول للممرضه (هاتيلى فوطين ومشرطين علشان نحطهم ف بطن المريض بدل ما نقفل كده وهو على لحم بطنه)!!؟


*من يومين تلاته كده طلع رئيس الوزراء الروسى بوتين فى لقاء تلفزيونى وقال انه بيتبادل النوم مع الرئيس الروسى,فهو ينتظر حتى يستيقظ الرئيس لكى ينام,وذلك لمتابعة احوال البلاد,فصفق له الحاضرين تصفيقا حادا
بعد ما سمعت الحوار ده دار ف دماغى ساعتها سؤال نفسى اسأله لرئيس الوزراء بتاعنا(نظيف باشا).

؟؟
؟
 هو حضرتك يا سيادة رئيس الوزراء بتتبادل النوم مع السيد الرئيس!؟

بس اعتقد ان رده هيكون كالاتى

(انت اهبل يا ابنى!!,احنا مابنمش اساسا)!!؟




 *كنت وانا اصغير كل اللى يسألنى نفسك تطلع ايه يا حبيبى؟؟ اقولهم اعلامى او صحفى
وكنت بقول ان شاء الله ابقى صحفى ف جريدة الجمهوريه,لكن ربنا لم يوفقنى  انى التحق بكلية اعلام والتحقت بكلية تجاره ووقفت معايا ايامها على 30% بس تخيلوا,حلمى تبخر علشان 30%!!؟
لكن الوقتى لما بشوف جريدة الجمهوريه او اشم ريحتها من بعيد يجيلى ضيق تنفس على طول وحموضه ونفسى بتغم عليا.

الثلاثاء، 7 ديسمبر 2010

تزوير الانتخابات في مصر - 3

فضيحة تزوير الانتخابات فى مصر 2010 مجلس الشعب.flv

فضيحة الانتخابات المصرية 2010.flv

فضيحة الانتخابات المصرية 2010.flv

فضيحة انتخابات فى بلبيس 28 11 2010

قبل ما أنام فى حاجات لازم اعملها

الخميس، 24 يونيو 2010

يعنى ايه كوك زيرو!!!؟


يعنى ايه كوك زيرو!!!؟ 

الناس كلها بتسال.


كوك زيرو:

مش إن أبوك يا خدلك أرض فى الشروق ويطلع تحتها بترول(لالالالا)

ولا إنك تقابل بنت ع الشات وتطلع بجد بنت(لالالالا)


مش دى كوك زيرو!!!؟


ولا إن مراتك تتصل بيك وأنت بتلعب بلاى ستيشن مع أصحابك وتقولك"كام كام يا حبيبى"!!!!!!!!!!؟


لالالالالالالالالالالالالالالالالالالالالالا


أنا عندى الجواب بعد التفحيص والتمحيص والدراسة أقدر أقولكم يعنى إية كوك زيرو!!!؟


كوك زيرو: يعنى إن الحكومة تدرس استيراد الغاز ,فى نفس الوقت اللى احنا بنصدرة لإسرائيل.(حاورينى يا طيطة).


كوك زيرو: يعنى إنك تختار السودان علشان تلعب فيها ماتش فاصل(أشقاء وكدة يعنى)والسودانيين يشجعوا الجزائر!!!؟


كوك زيرو: يعنى إن طوبة حزينة تكون سبب فى عزل اتنين من المحافظين!!!!؟


كوك زيرو: يعنى إن نفس الطوبة اللى فوق دى بس على كبير شوية تكون سبب ف خروجنا من كاس العالم!!!؟


كوك زيرو: يعنى إن ولامؤاخذة(جاموسة)تكون سبب فى اقالة وزى


كوك زيرو: يعنى إن جندى مصرى مسلم يقتل على الحدود بايد جندى مسلم فلسطينى (فالتحيا العروبة)


كوك زيرو: يعنى إنك تكتب على جوجل للترجمة (إسرائيلى يقتل فلسطينى) تطلعلك الترجمة بقدرة قادر(فلسطينى يقتل إسرائيلى)(ومحدش يفكر يجربها عشان هما عدلوها خلاص)


كوك زيرو: يعنى إن موظف فى اتحاد الكورة يقبض مرتبة فى أول شهر 400 جنية وبعد سنتين يكون مرتبة 15000 جنية(أوعدنا بشغلانة زى دى يا رب)!!!!؟


كوك زيرو: يعنى إنك تمشى فى شوارع المحروسة تلاقى العيش ع الرصيف والجذم فى الفاترين(يبقى أنت أكيد أكيد فى مصر)؟


كوك زيرو:إن الريس يسأل محافظ الشرقية(بلدك إية؟)ويرد علية المحافظ ويقولة(اللى تشوفة يا ريس)


كوك زيرو: يعنى أن تمتلك مصر أسرع قطار ف العالم,لا مش الصعيد ولا العياط,هو قطر من (القاهرة للجنة عدل


كوك زيرو: يعنى إن مصر تتقدم صناعيا وعلميا وتنتج أول أستيكة مصرية(والله براوة يا عمدة)!!!!؟


كوك زيرو: يعنى إن معظم الهاربين بفلوس مصر للخارج كانوا بيعملوا لنا موائد الرحمن وأتارى احنا اللى كنا عزمنهم.!!!؟


كوك زيرو: يعنى إن مصر ليست مملكة ولا يورث فيها الحكم,وعلى الرغم من كدة......(كملوا انتوا بقا)!!!؟


وهى دى العيشة مع كوك زيرو!!!؟

الخميس، 11 فبراير 2010

ااااااة يا بلد!!؟


ااااااة يا بلد


اااة يا بلد الظالم فيكى حاكم , والمظلوم محكوم

وقفت كتير على بابك , اطلب المدد والعون

لا رد عليا حاكم ولا سئل فيا مسئول

اااااة يا بلد
اااة يا بلد دية المقتول فيكى خمسين

والنصاب يا دوب بياخد لة شهرين

ويا مكتر اهلك الغلابة والمساكين

ااااة يا بلد
فيكى الجذم بتتحط ف البتارين

والعيش بيترمى ع الرصيف باليوم واليومين

ااااة يا بلد

اااة يا بلد الحرامى فيكى باشا وبية ووزير

والشريف فيكى زية زى الغفير
ااااااة يا بلد
ااااة يا بلد يا مكتر فيكى العاطلين والخامورجية والحشاشين

دة حتى كباراتك بيشربوا شاى بالياسمين

اااااة يا بلد
اااة يا بلد فيكى قناة السويس

واثارك مش موجودة حتى ف باريس

واهلك مش لاقيين رغيف العيش

اااة يا بلد
اة يا بلد لما سابك احمد وطلع بقا زويل

اااة يا بلد

اة يا بلد كنتى امة محمد اصبحت الان امة مهند


اااااااااااااااااااااة يا بلد

كان هنا انسان!؟


كان هنا انسان


كان هنا انسان عقل وقلب ولسان

كان هنا بنى ادم اتولد من صلب ادم

وفجأة

مات الانسان

وسكت اللسان

وبقى الكلام

كلام عن قلب مات ومات معاة صاحبة

كلام عن حب كان وجة الزمان طاح بة

كلام عن حلم اتولد ومات قبل ما نفرح بة

كلام عن روح فى جسد مجروح وعنق مدبوح

وسر مدفون والقلب حالف عنة ما يبوح

وبطل السر حبيبين

ولما حسوا ان السر هيزيد عن اتنين

اختاروا الموت

ومات فيهم الانسان

وسكت فيهم اللسان

وبقى منهم شوية كلام