ليله خُطف فيها الرئيس!!!؟

سمعتوا مثلى تماما وقرأتم من تصريحات عن مؤامرة خطف الرئيس المصرى د\محمد مرسى وتهريبه الى قطر,المشكله ان الكلام د يطلع على لسان احد قيادات جماعة الاخوان المسلمين وهو على ما اذكر الامين العام لجماعة الاخوان,واليكم السيناريو الفظييييع



يعنى هييجى مثلآ حمدين والبرادعى وعمرو موسى فى ليله كالحة السواد ومعاهم الربع نقل ويقفوا قدام قصر الاتحاديه بالربع نقل ,وطبعا هتفضل دايره علشان يخطفوا ويجروا ,وهينزل عمرو موسى وحمدين ويفضل البرادعى على الطاره علشان العظمايه كبرت ,وينزلوا السلم من صندوق العربيه ويحطوه على السور ويطلعوا السلم وينطوا ف قلب القصر ,ويقوم عم مرعى البواب شايفهم ويقول امسك حرامى يقوم عمرو موسى ضربه ع راسه موقعه مغما عليه وحمدين يضرب الباب بالرجل ويخش يلاقى سيادة الرئيس معاه فيديو كول مع خيرت وبديع,يقوم حمدين مطلع السلاح ويقوله اخشع يامرسى وهات التليفون,وياخد من الريس التليفون ويقول لخيرت وبديع سيبوا الرياسه هنجيبلكوا مرسى مش هتسيبوا الرياسه انتوا الخسرانين ويضحك ضحكات شريره متقطعه هو وموسى وياخدوا الريس ويهربوا لقطر ف الربع نقل

.................................

مهو انتوا اللى فتحتوا الباب للشعب انه يقول الكلام ده



انا عندى سؤال بالله عليكم

اين هيبة الرئاسه!!؟

اين هيبة الرئيس!!؟

اين هيبة الدوله!!؟

لو كان الاخ اللى قايل الخبر ده,مفكر مثلا انه كده بيحذر الرئيس مثلا!!!؟

بالعكس ده انت كده بتقلل من هيبته,ابعتله اس ام اس يا سيدى ,كلمه ف التليفون,ابعتله ميل ,اكتبله تويته زى البرادعى,بينك وبينه يا اخى مش ع الملىء كده ,رئيس مين

اللى يتخطف يا اخونا !!؟,انا مش فاهم يعنى!!؟

هو احمد حلمى ف جعلتنى مجرما!!؟

ولا ده على اساس انه ايه!!؟ شوال بطاطس مثلا!!؟

عيب يا جماعه والله

انتوا كده بتضروا بالرئيس اكتر ما بتفيدوه



مش تقولولى مؤامره وخطف الرئيس وتهريبه لقطر وتتطفية السجاير ف ودنه والكلام اللى اقل ما يوصف بيه انه تافه جدا



ارجو جماعة الاخوان وحزب الحريه والعداله انهم يقفوا بجانب الرئيس ويساندوه لما فيه مصلحة الوطن و لا تتحدثوا ب اسم الرئاسه

متحرجوش الراجل اكتر من كده,الراجل مش حط صوابعه العشره منكم ف الشق,لا,ده اجر الشق وقعد فيه.

يوميات شاب من شباب 25 يناير

(اليوميه الاولى)

*مشروع خطوبه وفشل*

صورة حمايا العزيز

طبعا اخدتنى الجلاله والعظمه لما عرفت ان شباب 25 يناير بينضرب ليهم التعظيم ف كل حته,وكأنه كارنيه v i pومتعلق ع صدرك

لو انت داخل مصلحه حكوميه وعرفوا انك من شباب 25 يناير,تلاقى الاحترام والادب نزل عليهم,مش بعيد حد يشدلك كرسى عشان تقعد وشاى وحاجه ساقعه وكده

وف المواصلات كمان لو قاعد جنب راجل كبير مثلا وعرف انك من الشباب الثورجيه بتوع 25 يناير ممكن يحاسبلك ف الميكروباص وانا كنت بستغل الموضوع ده صراحه

المهم لما عرفت ان كلمة 25 يناير لها مفعول السحر على كل مواطن مصرى مهو يوم الاستقلال وثورة الحريه قلت لازم استغل الفرصه واروح اتقدم للبنت اللى حمضت جمبى دى

نفسى قبل ما اموت يا جدعان ألبس دبل,والاقى حد اقوله ياعمى ويا نسيبى العزيز وكده

وكلمتها وقولتلها روحى كلمى ابوكى وقوليله انى جاى اخطبك طبعا هى فقدت الوعى من هول المفاجأه

وبعد مافاقت قالت انت ايه ورثت!!؟

قلتلها: لا

,قالتلى لقيت شنطة فلوس ضايعه!!؟

قلتلها: لا

قالتلى:سرقت !!؟على اخر الزمن اتخطب لحرامى!!

قلتلها:بس ياجزمه قديمه ده وش واحد يعرف يسرق حلم حتى


قالتلى امال هتيجى تخطبنى وتتفق مع ابويا ازاى!!؟


قلتلها متقلقيش انا معايا الحل



وحددت المعاد مع ابوها,واستلفت من واحد صاحبى ورقه ب 100 ظريفه اشتريت بيها علبة شيكولاته فخمه وتوجهت لمنزل العروسه
وانا بغنى(واركب الحنطر..درجن درجن واتحنطر)!!؟


خبطت ع الباب
,فتح اخو العروسه الباب وبصلى من فوق لتحت وقالى اهلا يا حبيبى اتفضل دخلت وسلمت على ابو العروسه وامها
وبعدين اديتلهم علبة الشيكولاته ام 100 جنيه دى وقولت لابوها اتفضل قالى ليه بس التعب ده قولتله لا ولا يهمك يا عمى تعبكم راحه(بس كان عينى فيها بصراحه) علشان كانت كوفرتينا وجواها ورقه كده صغيره بيبقى مكتوب فيها حظك وكده,مهو انا فتحتها اخدت اتنين وقفلتها تانى,زى ما كانت جايه!!!؟



وطبعا قعدت ساكت وهما برضه قعدوا ساكتين والصمت عشش على المكان
فقلت لازم اكسر الصمت ده واشيل الحواجز دى ده احنا هنبقى نسايب يعنى فعطست وكسرت الحاجز وقالولى يرحمكم الله


واتكلمت وكأنى بقول خطبه عظيمه وقولتله:
والله يا عمى انا جاى اطلب ايد بنتكم المصونه ومش هلاقى نسب احسن من نسبكم

رد وقال:ده الشرف لينا يا حبيبى

هو انت بتشتغل ايه!!؟

وكنت حاسس ان السؤال ده هيتقال هيتقال,اصل زمن احنا بنشترى راجل وانت ابننا والحوارات دى انتهى من زمان

قولتله: انا بكالريوس تجاره يا عمى

قالى :ماشى بتشتغل ايه يعنى!!؟

قولتله :والله لسه ملقتش الشغلانه اللى تحقق طموحى

زغرلى حتة زغره وحماقة الاطفال فى عينيه

وقولتله :بس انا من شباب 25 يناير ع فكره

قالى بجد!!؟

قلتله: طبعا العبد لله كان محمول على الاكتاف وبيهتف ب اعلى صوت,وكان ليا الشرف انى صاحب اول طوبه جويه اتلقت فى مبنى الحزب الوطنى ف دمياط

قالى :ما شاء الله عليك يا ابنى,ونعم النسب

قالى: طيب بالنسبه للشقه عندك شقه!!؟

قولتله: يا عمى بقولك :شباب 25 يناير وصاحب اول طوبه جويه!!؟

قالى طيب بالنسبه للمهر والشبكه!!؟

قولتله: يا عمى ده انا كنت فوق الاعناق ف 25 يناير!!؟


قالى: طيب معاك اللى يثبت!!؟

قولتله: يثبت ايه ولامؤخذه!!؟

قالى: يثبت انك كنت ف المظاهرات!؟

قولتله: يا عمى ده انا شميت كمية غاز لسه عامله دماغ معايا حتى الان

قالى: بس ده مش اثبات!!؟

قولتله :طيب اثبتلك ازى!!؟

قالى: هات صوره لك وانت كنت ف المظاهرات مثلا

قولتله: يا عمى هو انا كنت بتظاهر ف جنينة الاسماك هروح اتصور,ده  احنا كنا بنجاهد وغاز مسيل للدموع ورصاص ودنيا تانيه!!؟

قالى: للاسف طلبك مرفوض!!؟

قولتله: ليه بس يا عمى اسمعنى بس,اللى كانوا بيتصوروا دول العيال السيس احنا كنا بنموت هناك وربنا وكان فيه ناس كتير هناك واسألهم حتى!!؟

قالى:برضه مرفوض

قولتله:ايه يا عمى المعامله دى انت حافظ مش فاهم ولا ايه!!؟


قالى :لا ابراهيم ابن الحاج شاكر متصور وهو ف المظاهره

,اما تجيب ليا صوره وانت ف المظاهرات,واما مفيش بنات عندنا للجواز!!؟




واتفضل اطلع بره


قولتله:يا سيدى يهديك يرضيك!!؟

يقولى:مرفوض



يا عمى ده انا صاحب اول طوبه جويه سقطت ف مبنى الحزب الوطنى

يقولى:برضه مرفوض


وخدنى اخو العروسه وطلعنى بره البيت وقالى معلش اصله عصبى شويه,انا ممكن اقنعه بس ابقى انت هات الطوبه اللى رمتها على مبنى الحزب وانا ممكن اخليه يوافق!!؟

سنه اولى ديمقراطيه

سنه اولى ديمقراطيه

كل المفاهيم فى مصر الوقتى اتغيرت
يعنى مثلا:لما تيجى تسأل شخص ما معنى الديمقراطيه قبل 25 يناير؟يرد ويقولك
هو ذلك الشىء الهلامى الذى يتناقلونه فى وسائل الاعلام وفى الخارج ولا نعرف عنه شىء!!؟
اما لما تيجى تسأل عن معنى الديمقراطيه بعد 25 يناير!!؟ هتلاقى الرد رد ديمقراطى ,يعنى هتلاقى اختلاف اساسا فى تعريف الديمقراطيه من شخص لاخر,وبكده بقا انت تعرف ان الديمقراطيه فعلا بقت موجوده

وطبعا بغض النظر عن تعريف الديمقراطيه بالنسبه للعقيد الليبى ملك ملوك افريقيا وامبراطور الطراطير(معمر القذافى)علشان عنده تعريف الديمقراطيه هى ديمومة الكراسى للحكماء وده يخلينى اقوله بالفم المليان حمرااا(لا مؤخذه)

هنا ف مصر احنا حاليا ف سنه اولى ديمقراطيه,فالطبيعى ان فى ناس كتير لسه مشوشه
كأنك كنت قاعد ف الضلمه بقالك 30 سنه وفجأه طلعت ف النور,ف شىء طبيعى انك متشفش وتلبس ف الحيط وتفتح عين وتقفل التانيه كل ده وارد

وشىء طبيعى لما يكون فيه استفتاء تلاقى ناس بتقول نعم وناس بتقول لا
دى ظاهره جميله جدا,انا شخصيا اول مره اروح اقتراع سواء كان انتخابات او استفتاء وابقى مش عارف النتيجه قبل ما اقترع وابقى متلهف انى اعرفها

بصراحه الحاج( مبارك),الله لا يعزه, مكنش مخلينا عايشين ف الحيره ولا التشويق ده وكنا بنعرف النتيجه قبل ما نروح ننتخب وساعات كان هو بينتخبلنا وبيوفر علينا الوقت والجهد ده

احنا خلاص دخلنا عهد جديد عهد فيه الشعوب هى اللى تحكم والرؤساء عليهم السمع والطاعه

خلاص احنا نتيجة الاستفتاء عرفناها واحترامناها

المفروض اننا داخلين الوقتى على مرحلة الانتخابات البرلمانيه والرئاسيه
مش عايزين بقا نائب ييجى يضحك علينا بخمسين جنيه وكيلو مشبك علشان ننتخبه
ولا ييجى يوعدنى بوظيفه ويقولى هرصفلك قدام بيتكم ونبقى كده قشطه
مش عايزين نضيع الثوره اللى عملناها(متجيش تغمس الايس كريم بالعيش)ده انت تبقى جاحد يعنى!!؟

عايزين ننتخب شخصيه محترمه مثقفه تمثلنا فى برلمان ديمقراطى
ننتخب شخص يطورلى التعليم ويساعد ف اصدار التشريعات ويحاسب الحكومه لو غفلت عن دورها ولو فيه تقصير يكشفه
متديش صوتك لجاهل ولا لصاحب مصلحه ولا مرتشى ولا الاشكال الزباله اللى احنا عارفنها دى
عايزين اشخاص نزيهه شفافه تمثلنا(يعنى تحط ايديك ورا الشخصيه دى تشوفها من كتر شفافيتها)

مش عايزين دم الناس اللى ماتت دى يروح هدر,مش عايزين نائب بيجرى ورا الحصانه ولا قرض حسن ولا عربيه ولا توكتوك

احنا العالم كله احترامنا علشان احنا  علمنا الحكام الانحناء ,مش عايزين بقا نضيع ثورتنا ب ايدينا

واعرف ان بلدك اجمل بيك وصوتك امانه لازم يروح للى يستحقه

ويسئلوننى لماذا قمتم بالثوره!!؟

           ويسئلوننى لماذا قمتم بالثوره!!؟

اثناء تحدثى مع احد الاصدقاء الغير مصريين وجدته يسألنى انتوا ليه عملتوا الثوره دى!!؟

كان لازم ارد عليه واعرفه ان الشعب قام بالثوره دى بعد ما فاض بيه من كمية الظلم والفساد والقهر اللى تعرض لها

1-عندنا 30 مليون مصرى عندهم اكتئاب منهم مليون ونص مصابين بالاكتئاب الجسيم ومن بينهم 15%يلجأون للانتحار.

2-مصر تحتل المركز 57 من بين 60 دوله فى تقرير البؤس العالمى.

3_عندنا 48 مليون فقير و1109 منطقه عشوائيه.

4_عندنا 2 مليون ونص يعيشون فى فقر مدقع.

5_عندنا45%من المصريين تحت خط الفقر بأقل من دولار ف اليوم.

6_عندنا 12 مليون مصرى دون مأوى

7_عندنا حوالى88 الف و779قتيلا و 233 مصابا فى حوادث الطرق من 1990الى 2006.

8_لدينا خلال 6 سنوات 7394 حادث بقطاع السكه الحديد ومصرع573 شخص كما ان لدينا 4 مليار خسائر سنويه بسبب حوادث الطرق.

9_وعندنا 39 مليار و373 مليونو524 الف جنيه اموالا و 370441 فدان دارت حولهم الفساد المالى والادارى والاهمال واهدار المال العام.

10_مصر فى المركز 115 فى عام 2008 فى مؤشر النزاهه والشفافيه.

11_لدينا اعلى معدل لوفاة الاطفال فى العالم50 طفل لكل الف طفل.

12_لدينا 8 مليون شخص مصاب بالسكر و 9 مليون مصابون بفيرس سى.

13_لدينا 20 الف مصرى يموتوا سنويا بسبب نقص الدم.

14_لدينا اكثر من 100 الف مواطن يصابون بالسرطان نتيجه لتلوث المياه.

15_لدينا سيارة اسعاف لكل 35 الف مواطن.

16_لدينا 10 مليون عاطل من سن 15 الى سن 29 سنه اى 22%من اجمالى قوة العمل.

17_لدينا 9 مليون شاب وفتاه تخطوا سن 35 بدون زواج,ونسبة العنوسه17%ايضا.

18_لدينا 40حالة تعذيب عام 2007 منهم 28حاله ثابتين رسميا.

19_لدينا 56 حالة تعذيب بداخل السجون من بينهم 13 حالة وفاه غامضه و25 حالة اضطهاد واحتجاز.

20_عندنا وزير كان راقص فى فرقة رضا.

21_عندنا وزيره اخر شهاده حصلت عليها هى الابتدائيه.

22_عندنا وزير معاه مؤهل متوسط.

23_عندنا احمد عز الامين فى الحزب الحاكم كان عازف درامز.

24_عندنا خريجى هندسه بتقديرات عاليه بيشتغلوا سواقين.

25_عندنا كيلو اللحمه ب 90 جنيه ومتر مدينتى ب نص جنيه.



كل ده وبيسئلونى احنا ليه قمنا بالثوره

مصر التى لم اعرفها من قبل!!؟

سبحان مغير الاحوال!!

ارجع معايا كده من شهرين لورا وافتكر,,,,

البلد ممسوكه من حديد...الامن مستتب...حرامية البلد موجودين ولسه بيسرقوها..التعذيب شغال زى اللدعه..الواحد كالعاده مش عارف يتنفس...انا شخصيا كنت بخاف اكتب بحريه وليا خط احمر ولو زودت عنه مقالاتى مكنتش بتتنشر...بخاف اعدى من قدام القسم...


مبارك الابن الله لا يبارك فيه كل شويه يطلع يقولك (عجلة التنميه زى الفل وكل يوم بننفخ فيها,ودخل المواطن زاد,والمواصلات فاضيه,والشباب بيغرق نفسه جيل وبرفانات والحياه حلوه للى يفهمها)


...على الجانب الاخر ناس بتجيب اكلها من صناديق الزباله...وشباب بالهبل مش لاقيين حتى مكان ع القهاوى والرشوه ف كل مكان والفساد بقا زى الهواء اللى بنتنفسه والنصب والسرقه بقوا مترخصين

انا نفسى قلت احنا محتاجين معجزه فى زمن تاهة فيه المعجزات,محتاجين صلاح الدين ييجى يحررنا


وفجأه..


.مظاهرات تجتاح تونس...وانتحار شاب بسبب البطاله...و45 الف متظاهر امام وزارة الخارجيه التونسيه...وبن على يظهر ويقول انا فهمتكم...

وبعدين بن على يركب الناقه ويشرخ,ويشرخ ف المعجم العربى يعنى يهرب...

وتونس تتحرر,وارادة الشعب تنتصر على ارادة الطاغى(اذن مفيش حاجه مستحيل)


من التجربه التونسيه عرفنا انه ممكن الحق ينتصر فعلا على الباطل وان كلام الكتب اللى كنا بنقرأه ان لا شىء يعلو فوق الحق وارادة الشعوب كان صحيح..وان ما مات حق وراءه مطالب دى مقوله عظيمه وسليمه

وقرر الشباب المصرى يفعل التجربه التونسيه ف مصر واتفقنا على يوم 25 يناير عيد الشرطه المستبده المصريه,وجاءت ساعة الحسم,ولم يكن احد يتوقع ان شباب هذا الجيل اللى تربى ع الفساد والظلم والقهر والبطاله ولم تكن استخبارات العالم كله تتنبأ بما سيحدث!!؟


نزل الالاف الى الشوارع مرددين (عيش ..تغيير..حريه..عداله اجتماعيه)(الشعب يريد سقاط النظام) ,كانت هتافات بتدوى زى الرصاص وزئير الاسود


لم يدرك النظام ان المارد الذى بنفوس هؤلاء الشباب قد حان الوقت ليستيقظ..مكانوش بيخافوا لا من قنابل مسيله للدموع و رصاص ولا اى حاجه,كل همهم انهم يعملوا حاجه لمصر,مات كتير واصيب اكتر,وانا واحد من الشباب ندمت اشد الندم انى لم اشارك يوم 25 بالمظاهرات بدمياط لان والدى ووالدتى منعونى واخدوا مفاتيح البيت منى وحلفوا عليا ما اروح ف حته وعملولى حظر تجول بالبيت..


حسيت ان شرف كبير فاتنى..لكن اقسمت بينى وبين نفسى انى لازم انزل جمعة الغضب..ويا ريت لو استشهد يعنى هلاقى موته احسن من كده!!؟

وجت جمعة الغضب ونزلت انا واصحابى وكانت كل قنبله بتترمى علينا بتزيدنا حماس..كل رصاصه بتنطلق علينا بتقوينا ..كان من وجهة نظرى جهاد فعلا..لان اعظم الجهاد كلمة حق عند سلطان جائر..


وعرفنا العالم كله ان دول مش اى شباب..ده مش شباب نت وقهاوى..ان احنا شباب قد المسئوليه وعملنا اللى الجيل اللى قبلنا معرفش يعمله..انا فخور انى من الجيل ده والله العظيم

وهرب الامن..


واعلن الريس اقالة الحكومه..وعين وزاره جديده..وشفنا قد ايه المصريين رجاله وقت الشده وكنا بنحرص بعض ازاى ف وقت الازمه..وفضلنا ثابتين على موقفنا و اضطر الرئيس يعين نائب له..وفضلنا فى نضالنا لغاية لما تنحى هذا الطاغيه

وتحقق حلمنا >>>>حلم ملايين المصريين

خلال الفتره دى شفت اللى عمره ما شفته ف حياتى..شفت مصر مشفتهاش قبل كده


المسيحى بيصب الميه للمسلم علشان يتوضى...

شفت المتظاهر اللى كان بينضرب بالرصاص الحى من الشرطه شايل عسكرى مصاب وبيجرى علشان يوديه للاسعاف..

شفت واحده ست حامل بتقول انا مستعده اضحى ب ابنى اللى ف بطنى مقابل الحريه..

شفت شباب مش خايف الموت وبيجرى يقابل الرصاص والقنابل..

شفت الهتاف بيزلزل الدنيا..

شفت ظابط جيش محمول على اكتاف المتظاهرين وبيهتف والمتظاهرين بيرددوا وراه..

مسمعتش عن حالة تحرش واحده..مسمعتش عن حالة اعتداء واحده لا على كنائس ولا مساجد..

شفت المسلم بيناول المسيحى الانجيل بتاعه علشان يتلوا صلاواته..

شفت اللى عمرى ما شفته,شفت مصر تانيه,مصر اللى كنت بحلم بيها,مصر اللى كانوا بيقولوا عليها ف الكتب بلد الحضارات بلد الوحده الوطنيه مصر بلد الخير مصر بلد المأذنه والكنيسه

مكنتش اتخيل يوم من الايام انى هصحى من النوم من غير مبارك رئيس مصر والاصنام اللى جنبه,صحيت بعد تنحى مبارك الصبح بستنشق الهواء كان له طعم غريب,مش قادر اوصفه,هواء صافى ونقى

ياااااااااه,مين كان يتوقع ولا مين كان يصدق!!!؟

العالم كله اتكلم علينا
(اوباما):يجب ان نربى ابنائنا ليصبحوا كشباب مصر
(رئيس وزراء النرويج):الان كلنا مصريين
(رئيس النمسا):شعب مصر اعظم شعوب العالم ويستحق جائزة نوبل
(رئيس وزراء بريطانيا):يجب ان ندرس الثوره المصريه ف المدارس
(سى ان ان):لاول مره نرى شعب يقوم بالثوره ثم ينظف الشوارع بعدها
(منظمات مدنيه):الثوره المصريه اعظم ثوره ف التاريخ



انا فخور انى مصرى...انا فخور انى من الجيل ده..انا فخور انى نزلت الشارع وشاركت ف الثوره

انا اتولدت من جديد بعد 25 يناير

وبقول لكل ام فقدت ابنائها ف الثوره (لا تحسبن الذين قتلوا فى سبيل الله اموات بل احياء عند ربهم يرزقون)

,لكل طفل اتيتم( والدك ده بطل وكلنا بنفتخر بيه وانا كان نفسى ابقى زيه)

,لكل امرأه ترملت(جوزك مامتش جوزك عايش بروحه معانا)

وبتأسف ليهم انى مقدرتش ابقى شهيد زيهم,او مقدرتش اعمل اى حاجه لهم

ومليون رحمه على ارواحهم الطاهره


من النهاردة دي بلدنا احنا,وده حقنا احنا,وده دمنا احنا

مش عايزين نصنع مبارك تانى...مش عايزين ندخل الفساد تانى...عايزين العالم كله يبص علينا يقول المصريين اهم


، ماترميش زبالة، ماتكسرش إشارة، ماتدفعش رشوة، ماتزوّرش ورقة، اشتكي أي جهة تقصّر في شغلها.. متسمحش لظابط يعذب مصري زيك.


. استمتع بحياتك.. اقرا وثقف نفسك.. حب نفسك وحب الناس اللي حواليك..


.. اوعى تهين حد.. اوعى تسخر من حد.. أوعى تنسى حريتك أبداً




خلي بلدك اجمل بيك


وافتخر انك مصرى وقولها ب اعلى صوت

احمد عز فى المحكمه @YOUM7.COM

(كـــــــــــــلام ف ســــــــــــرك)

السلام عليكم ورحمة الله وبركاته

(كـــــــــــــلام ف ســــــــــــرك)

*بعد مهزلة الانتخابات بقترح على المجلس الموقر وعلى الدكتور احمد فتحى سرور ان يلغى كلمة(الموافق يتفضل برفع يده)  ويخلى مكانها(قشطه يا جماعه ولا مش قشطه؟؟) والرجاله ترد عليه وتقوله(قشطه يا ريس) وخصوصا ان مفيش حد هيقول مش قشطه ولو حتى حد قال مش هيتسمع لانه هيبقى نفر ولا اتنين ف وسط 500 عضو.


*اثبتت العلاقه الوطيده بين مصر واسرائيل والتى تعتمد على مبدأ (خد وهات)ان اسرائيل قالت لنا الاول (هات) واحنا بسلامة نيه اديناها الغاز بتاعنا وطلعنا كرماء  اخر حاجه معاها, اثارنا الغاز على انفسنا انطلاقا من قول الله تعالى(ويؤثرون على انفسهم ولو كان بهم خصاصه)لدرجة ان امى امبارح ملقتش غاز تعملى كباية عصير الجوافه السخن بتاعى,واستنينا ان اسرائيل تدينا اللى احنا اتفقنا عليه وبالفعل اديتنا اسرائيل على60 قلم على قفانا,وذلك بعد اكتشاف شبكة جاسوسيه ف مصر كانت تتجسس لصالح اسرائيل,والله عمار يا مصر يا ام الدنيا.


*طبعا احنا عارفين ان مجلس الشعب لازم يكون نصه من العمال والفلاحين والنص التانى فئات
كل ده جميل نيجى بقا لتعريف العامل والفلاح بنص الماده
الفلاح:الفلاح حسب نص الماده هو من تكون الزراعه عمله الوحيد ومصدر رزقه ويكون مقيما بالريف
اما العامل:هو من يعتمد بصفه رئيسيه فى دخله على عمله اليدوى او الذهنى فى الزراعه او الصناعه او الخدمات(ولا يكون من حملة المؤهلات العليا)
وركزوا الله يكرمكم ف اخر حته دى,نيجى بقا للعمال والفلاحين بتوعنا ف مجلس الشعب نشوفه بيشتغلوا ايه؟؟
خد عندك يا سيدى(رجال اعمال-مفتشين بمجالس نيابيه-حاصلين على الدكتوراه-بكالريوسات الدنيا والاخره-مديرين عام بالمديريات)
لغاية كده وهقولك يا اخى عديها لكن اللى فرسنى بقا ان عدد كبير منهم عنده عضويات فى اندية الاهلى والجزيره,انا مش متضايق علشان انا زملكاوى والله ,ولكن فى فلاح او عامل ف الدنيا بيبقا عنده عضويه ف انديه بالاف الجنيهات!!!؟ ليه فلاحين ف
الكونجرس!!!؟


*لفت نظرى تعليق الرئيس مبارك على انشاء المعارضه لبرلمان موازى بعد عدم نجاحهم ف الانتخابات
قال ايه الريس؟؟
قال وهو مبتسم كده وغاسل سنانه(سيبوهم يتسلوا)!!؟
وانا من هذا المزنق بدعو السيد الرئيس جمال مبارك,لالا,قصدى الرئيس محمد حسنى مبارك
انه ينزل للشعب مع التموين (لب سورى وفول سودانى) للتسليه علشان الشعب يتسلى هو كمان ولا يعنى المعارضه احسن مننا؟؟



*سمعت والله اعلم ان مصر هتستخدم الانسان الالى فى اجراء العمليات الجراحيه
يا رب طبعا يكون الخبر ده كذب وافتراء,لان لما الانسان الالى هييجى طبعا هيتعدى من العقليه المصريه الفتاكه,وقبل ما يخلص العمليه هيقول للممرضه (هاتيلى فوطين ومشرطين علشان نحطهم ف بطن المريض بدل ما نقفل كده وهو على لحم بطنه)!!؟


*من يومين تلاته كده طلع رئيس الوزراء الروسى بوتين فى لقاء تلفزيونى وقال انه بيتبادل النوم مع الرئيس الروسى,فهو ينتظر حتى يستيقظ الرئيس لكى ينام,وذلك لمتابعة احوال البلاد,فصفق له الحاضرين تصفيقا حادا
بعد ما سمعت الحوار ده دار ف دماغى ساعتها سؤال نفسى اسأله لرئيس الوزراء بتاعنا(نظيف باشا).

؟؟
؟
 هو حضرتك يا سيادة رئيس الوزراء بتتبادل النوم مع السيد الرئيس!؟

بس اعتقد ان رده هيكون كالاتى

(انت اهبل يا ابنى!!,احنا مابنمش اساسا)!!؟




 *كنت وانا اصغير كل اللى يسألنى نفسك تطلع ايه يا حبيبى؟؟ اقولهم اعلامى او صحفى
وكنت بقول ان شاء الله ابقى صحفى ف جريدة الجمهوريه,لكن ربنا لم يوفقنى  انى التحق بكلية اعلام والتحقت بكلية تجاره ووقفت معايا ايامها على 30% بس تخيلوا,حلمى تبخر علشان 30%!!؟
لكن الوقتى لما بشوف جريدة الجمهوريه او اشم ريحتها من بعيد يجيلى ضيق تنفس على طول وحموضه ونفسى بتغم عليا.

تزوير انتخابات مجلس الشعب 2010